Kada vam je potrebno nešto kao dodatak predjelu, a da ga u isto vrijeme možete jesti i zasebno, vjerujemo da je rolat odlično rješenje. Može uvijek biti drugačijeg ukusa, zavisno od toga šta vam se u tom trenutku jede. Ipak, predstavljamo vam malo drugačiji rolat- od spanaća i kuvanih jaja.
Za 4 osobe je potrebno:
– 500 grama kora za pitu
– 400 grama obarenog spanaća
– 200 grama praške šunke
– 100 mililitara pavlake
– 8 barenih jaja
– ulje
– so, biber
Priprema:
Obareni spanać isijecite i sastavite sa pavlakom i sjeckanom praškom šunkom, te posolite i pobiberite. Tri kore stavite jednu na drugu i svaku poprskajte uljem.
Zatim rasporedite dio fila od spanaća i stavite dva jajeta, pa uvijte pitu. Od preostalog materijala napravite još pita, poređajte ih u podmazan pleh i svaku premažite uljem.
Pecite oko 40 minuta na umjerenoj vatri. Isječenu pitu poslužite sa kisjelim mlijekom ili jogurtom.
Prijatno, nadamo se da će ukućani uživati! 🙂
