Neobična priča spojila je i zbližila danas dva Beranaca, Janka Babovića i Vladicu Đurišića.
Janko je, naime, u jutarnjim satima ispred gradske apoteke pronašao 190 eura i odmah ih donio u naš radio.
On je potom sjeo u obližnji kafe bar, kada je primijetio drugog mladića kako se vraća prema apoteci i zagleduje oko sebe.
“Prišao sam mu i pitao ga šta radi? Rekao sam mu da sam ja pronašao petsto eura. On je iskreno odgovorio da je izgubio novac, ali ne toliko. Nisam poznavao čovjeka, morao sam ga iskušati” – kazao je Babović kroz osmijeh.
Kako se ispostavilo, mladić koji je izgubio novac je rudar beranskog Rudnika uglja i toga dana je primio platu.
“Primio sam platu i otišao da uplatim neke račune. Ono što mi je ostalo držao sam u zadnjem džepu pantalona. Kako je ispalo ne znam, ali naravno da sam se isjekirao. A kada sam se vratio istim putem, prijatno sam se iznenadio kada me je zaustavio moj sugrađanin koji je pronašao novac” – ispričao je Đurišić.
Oni su potom zajedno došli u lokalni radio gdje su ispričali ovu nesvakidašnju priču.
“Neću da krijem da sam bio i malo očajan. To možda nije nekom veliki novac, ali je meni sve i zarađujem ga teškim poslom u jami Rudnika uglja. Janko me je uvjerio da još uvijek ima poštenih ljudi i vratio mi osmijeh na lice” – kazao je Vladica.
Janko i Vladica izašli su zajedno iz lokalnog radija da popiju kafu i pritvrde neplanirano sklopljeno prijateljstvo.
“Ni jednog trenutka nisam razmišljao. Nisam znao šta da radim jer nije bilo dokumenata, samo svežanj novčanica. Na kraju je ispalo sve dobro, a posebno mi je drago kada sam saznao da se radi o rudaru i nekom ko novac pošteno i teško zarađuje” – kazao je Janko.
